عمر السفرجل ما يولي تفاح....
✍️📚كتبه: محمد اليحياوي/مكناس
عمر السفرجل ما يولي تفاح وعمر الشماتة ما يترجل
الشماتة يبقى شماتة قدام لي يعرفو عمرو ما يكون راجل
الراجل تربية وأخلاق ماشي دابة يرعى وينكر بحال العجل
شحال هما رجال غير بسمية ومن أفعالهم وأعمالهم تخجل
الذكورة بها تزدنا والرجولة مبادئ مولاها دايمين مبجل
الفرق بين الذكر والراجل بحال الفرق بين اللفت والفجل
يابنادم نوصيك لاتكون صالح غير في الحصاد كيف المنجل
استقامتك هي را سمالك وبها عند الناس معروف ومسجل
صادق وما تنافق عاشر ولا تخون لا تندفع لا تستعجل
زمان كثارو فيهم الشمايت القليل فيهم إنسان مترجل
صحاب المصلحة تكاثرو بحالهم بحال طيور الحجل
مصلحتي فيك مصلحتك في عندي عندك غير لغة الدجل
نوصيك يالفاهم حضي راسك قدام الشماتة راه دايمين كيبجل
ما عندو لا دين لاملة حياتو مصلحتو بلا ما يتأخر ويؤجل
سر المعنى بان والفاهم يفهم والشماتة عمرو لكان راجل مرجل.
تعليقات
إرسال تعليق