مجدوب وراسمالي كلامي وإلهامي وأقلامي...

 

مهماز الأطلس 🏊 ✏️✏️✏️

كتبها: محمد اليحياوي/مكناس

ياهلي يا حبابي ياعشراني لا تلومني في حالي خليوني نجدب كيف البوهالي

راه الإلهام سكني وما خلاني في حالي وليت عايش وتايه والنوم ما يحلالي

انتما قولو الله يعفو وأنا لي عارف ما بي وما بمثالي بغيت ربي ينظر من أحوالي 

النظم بالكلام وما جاد به الإلهام ما يشاور حيت فيه لقى راحتي بأقوالي وأفعالي

كل واحد باش بلاه مولانا وأنا راضي بكل ما لهمني به ربي بأشعاري وأعمالي

راحتي نوجدها في كل قصيدة نظمتها وفتقت فيها موهبتي وعبرت فيها عن خيالي

الله الله على الرسم بالكلمات وما دار في يخليني ساهر بلا نعاس طول الليالي 

على النظم ما أنا صابر وكل يوم تجود قريحتي وأنا مجاريها ما بغات تسالي 

هوايتي هاذي ما نخبيها عليكم نشاركها ونتقاسمها معكم يا حبابي وأجيالي 

وصفوني كيف بغيتو هاذا ما عطا الله حيت انتما لي قادين تفكو حبالي وأغلالي 

اعترافي ليكم بلي مجدوب على النظم باش تعذروني وتعطيوني مفاتيح أقفالي

عمر الإدمان على النظم ماعرفتو ولكن هذا قدر الله هو اللي بلاني وعارف هبالي

الله الله على الإلهام وما دار في ورضيت بقضاء الله هو العالم بأفضالي وأقوالي 

وبغيت نترشح وننجح باش نترفح ونتفطح...

لا تلوموني ياناس حتى أنا كبر طموحي بغيت نترشح ونولي مستشار

عاونوا خوكم وخا ضعيف في السياسة بغيت نركب سفن الإبحار والأخطار

ياك حتى أنا خوكم ومنكم ودعموني نولي بحال ذوك الخطباء الأخيار 

لاتطلبو مني نحقق لكم انتظاراتكم حيت هدفي هو نعيش في الازدهار 

أما نتما عطيتكم عاهد الله حتى نرد حياتكم ومشاكلكم كلها إشهار 

غير خليوني نغتني ونعيش عيشة الرفاهية ودعيو معيا في كل استغفار

 باش مولانا يغفر ليا على كل ما كذبت عليكم وحبكت لكم  من أحلام وأنوار

برنامجي واضح وشفاف ننجح ونترفح ونتفطح ونطلب منكم الاعتذار 

هاذ جهدي عليكم يا خوتي يا حبابي إيوا دعموني باش نولي مع الأشرار

ياك أنا مسكين بحالي بحالكم ولاباس نترفه أنا ونتما تعيشو الاحتضار 

كلامي ليكم يا خوتي يا خواتتي وجودو لهاذ الاختبار بلا استهتار

خممو وزيدو في التخمام وحكمو ضميركم قبل باش تواجهو هاذ الأطوار

الاختيار اختياركم والقناعة قناعتكم  ومماحتجين أي حد يوجهلكوم الإنذار 

لاتخذو كلامي مأخذ الجد أنا غير مجدوب بعيد على السياسة عزيز عليه يستفسر

طلبو الله يعفو علي من الإلهام ونشارككم اهتماماتكم حتى يدينا مولانا للمقابر

أما السياسة فبيني وبينها غير الخير والإحسان ما نعرف فيها  نغامر ولا نقامر.

من أحلام اليقظة: أنا غير داوي وغادي فحالي.

*/*قصيدة زجلية من ديواني "أشعار زجلية في زمن كورونا"