"الزهر.. ويا الزهر!"

مهماز الأطلس 🏊 ✏️✏️✏️

قالوا: "عندو الزْهر* يْهرسْ لْحجرْ!"
قلت ليهم: واشْ شْفتو يا ناسْ حالي؟
فين نْلاقى ازْهر لي نقَطّرْ؟
واشْجار كُلْها ناشفة تْلالي..
ضْرْبات الريح اليابسْ ولْخضرْ.
واشْ بْقا لمثالْكْم وامْثالي؟
اللي ابغى يا ناس غير ْوْكان يعْصْرْ..
يْعصْر دْم لْعروق ودْوالي.
راه الصّْبر تشكّى اليوم من الصّْبرْ،
وقال ليه:"خليني يا سيدي فْحَالي!
راني تكْويت يا خويا بالغْدْر!
وفْ طريق الشوك حْفاوْ نْعالي.
قالوا لْوالا *"كْثرة الصْبر كتْضبْر"*
وصْبْري يانا خافْ مْن اهْوالي.
واش عمْركم شْفتوا الصْبر ولّى يْهْضْر؟
منْ كْثرة الهَمْ صْبَحْ بوهالي.
الدار يا سْيادي مْظلمة ظلمة لْقبْر.
ويمكن حال القبر احْسن من حالي؟
لو كنت لقيتْ يا السّامعين ما نْعصر؟
كنتْ عْصرت غير الدْمع دْيالي!
حتّى دْموعي ولاتْ يا احْبابي حْجْرْ!
وكانت كتنزل وتْسيل بلْهطالي.
دارْ الضْمانة* من زمان عطاتنا بالظهر،
و خايضة فتْقرقيب النابْ واسْطالي.
وانا وانْتُمْ والاخرين اكْثرْ!
بغينا نعصرو! عنْبة ادْوالي!
لْعْنبة نْشْفات واصْبح لونها صْفْر!
وسْلالها ما بقاوا يا حْبابي سْلالي!
الناس عايشة اليوم عيشة البْقر..
وبنادم من الجوع ولْعْرا يْلالي.
البْقرة لقات فصة والرْبيع لخْضر,
وبنادم كياكُل من فْتيل لْحْبالي*
دار الضمانة غاااااااايبة ما تحْضْر.
واذا احضرت غير فلالّة ومالي!
بنادمْ يا احبابي اعْيا من كثرة الصْبر،
واتْقلابْ على فْراتْتْ* لْوصالي*
وحتى لْوصالي ما بقات اليوم كتعمْرْ؟
ولا طواجن تْبان على وجه طْبالي!
آجيوا نغنيوا جميع مع شيخ ْلحْضْرْ!
وغنا معاه لي ما عندو والي:

*الزهر...ويا الزهر...مالي يانا ومالي!..

ومالي يانا ما عندي ازهر؟"*